林丹狂揪李宗偉!

Ben Wong | 2016-08-19

Image description

林丹,三十二歲,奧運金牌世錦賽亞運蘇迪曼盃冠軍乜都贏過。

李宗偉,三十三歲,北京奧運、倫敦奧運、連埋唔知幾多屆亞運同世錦賽,從來未贏過,每一次入到決賽,都係屈居喺超級丹之下,慘被稱為千年老二。

不過,喺佢哋兩個人心目中,大家都心知肚明,彼此實力半斤八兩。歷來對戰成績,林丹領先25-11,佢能夠稍佔上風,唔係實力上有壓倒性優勢,李宗偉稍稍輸蝕嘅,應該係性格同心理質素,去到咁天才級嘅比拼,呢兩樣先係勝負關鍵。

睇返呢段highlights,閒閒地打二三十板,唔係我哋企喺度搓波嗰種,而係不停打四隻角左飛右撲,睇見都攰。片段最精華係2010年廣州亞運決賽,當時林丹未染黑冇紋身,好似第二個人咁,兩位天才,林丹不斷將波吊到前後左右,李宗偉就施展靚到絕嘅步法,輕易化解,然後超級丹又跳到二樓咁高全力扣殺,馬來西亞拿督又用0.5秒飛撲救起,再0.5秒翻身企返喺場中央準備防守。睇住佢哋不停狂揪,我諗兩位都會覺得好爽,頂級運動員最大樂趣,並唔係每場波贏21比0,咁只係得到勝利,一啲都唔好玩。只有遇到一位打極都唔死,大家都要施展渾身解數,幾乎打到抽筋先贏到一分嘅對手,先會愈打愈high愈過癮。

林丹同李宗偉,兩位都係識英雄重英雄嘅真漢子,最近,有記者問林丹會否掛拍,林丹一句:「只要李宗偉還在打,我就打!」幾咁豪情,真係男人嘅浪漫。至於向來比較內斂嘅李宗偉,佢咁講:「這是兩個人的約定吧,大家共同努力了四年,又共同站在了賽場上。」即使喺場內打生打死,兩位對對方嘅惺惺相惜,甚至愛,絕非一般運動宿敵咁表面。三年前嘅世錦賽,啱啱喺之前一年衛冕奧運金牌嘅林丹,幾乎休息咗一年,臨比賽前先復出比賽,全世界都認為佢唔夠比賽狀態,李宗偉應該可以復仇。結果,超級丹證明佢真係超級,休戰一年都咁勁,雙方打到決勝第三盤,林丹領先20-17,仲爭一分決勝分,可惜悲情始終唔放過李宗偉,激戰受傷,唔能夠完成最後一分。當時林丹不斷上前關心李宗偉傷勢,關心完先chok爆除衫慶祝,之後再細心幫手抬對方上擔架床,男人同男人之間嘅純愛,原來可以咁sweet。

今晚呢場四強戰,應該係兩位最後一次喺奧運舞台表演,論今年狀態,李宗偉毫無疑問勝一籌,但羽毛球比賽係逐場計,究竟李宗偉會唔會繼續悲情,好似英國天才桌球手Jimmy White咁,職業生涯遺憾地六奪世界亞軍,只能夠成為人民心目中嘅冠軍?今晚要先過林丹,同埋自己嘅心理關口先,好緊張!

(文:Ben Wong)