博客San San：由路賽到山賽 — 走出自己的Comfort Zone

今年，已經是第二年參加「揹水一戰」。

認識我的朋友都知道我很怕山路，一離開石屎路就WeWa鬼叫。行山次數五隻手指數得晒。十年前行過一星級的流水響，近兩年行過荔枝窩、青山和八仙嶺，每一次我估老公都有諗過親手將我幹掉。

面對長樓梯，我想哭︰「幾時先到頂﹖又話1公里嘅﹖成30分鐘我都未上到1公里﹖救命呀！」
終於上到頂，好開心咁擺晒pose影條里數柱，先發現「咁斜我點落返去﹖！會唔會跌死我﹖」
然後就那口那面咁樣樣，問「究竟有冇鞋唔跣架?」、「沙石路想跣死我咩?」、「天黑之前落唔落到山架﹖」、「點解落仲難過上﹖」、「幾時落到最底呀﹖」、「我淨係見到D梯級重疊埋一齊」。
最後一句係「有冇山淨係得上唔使落架﹖」

明顯地，我好怕山路。如果想避我就避上山就包我唔會再搵你。

上年柴娃娃同三個朋友組隊玩揹水一戰，係一個為乾旱地區籌建水設施，希望透過參賽者揹水完成15公里 / 30公里路段，道出「珍惜食水」的訊息。好老實，上年比賽的心態是貪玩，同三個朋友一齊揹住支水去玩，冇諗過要跑，亦唔知原來係屬於「山賽」。一路上，和朋友快樂地聊著天，拍拍照，慢慢地上斜又落斜，經歷仙境大霧，雖然用咗三個幾鐘完成，但全程都好開心。而最弔詭的是，玩完之後先知原來是玩緊「山賽」。

今年我再接再厲，與另一女友人參加15公里的揹水一戰，今次終於留意到，自己腳踏的不是石屎路，有沙有石有青苔有屎有樓梯。在愉快的氣氛下，我雖然曾經兩次差點被碎石跣到，但沒有再WeWa鬼叫，亦站得住陣腳沒有被絆倒。雖然心底裡仍然有疑問「有冇鞋著咗係唔跣架」，但也接受到自己在跣與跌的邊緣。面對長樓梯，雖然未能如其他參賽者般跑上去，但為免阻塞道路，我還是一口氣行了上去沒有停下來。原來，自己一直只是不為，已非不能。

當你害怕一件事，可能只是心魔，而非你做不到。揹水的路比其他山賽可能只是微不足道，但對一個Non-Yama Girl來說，已算是一個考驗。今天的我，仍然未愛上玩山路，但至少比較低階的山路路段，我已經在不知不覺間克服了，在無痛和輕鬆的情況下，走出了自己comfort zone。