兩大90後supermodel Gigi Hadid同Kendall Jenner，fit到漏的body是如何煉成的！

Ben Wong | 2016-06-01

Image description

瘦，可以天生；肌肉，就一定要用汗水換返嚟。

世上沒有不勞而獲，如果連兩位supermodel都要搏晒命先擁有perfect body，想fit，邊有得懶。

天橋下，兩位新紮supermodel經常孖公仔，不過講keep fit，各施各法。

Image description

先講講Gigi Hadid，擁有一位model阿媽（Yolanda van den Herik），基因上已先贏一半。讀書時期，Gigi是排球女將，間唔中再騎下馬，所以由細到大都係唔識停嘅活躍分子。讀完書搬到紐約，轉行做gym，畢竟自少操慣，對住機械舉下舉下，唔夠滿足唔過癮，於是戴上拳套打拳。

Image description

女仔打拳，早已不是新聞，Gigi幫襯嘅拳館，是紐約區嘅Gotham　Gym，聽個名都夠霸氣。如果大家以為女仔打拳都係姐手姐腳揈揈下，錯了，唔信嘅話，睇下佢放喺instgram條片，拳腳當然不是重量級，但要節奏有節奏，要步法有步法，打得仲幾靚。據聞Gigi對boxing非常狂熱，如果得閒在紐約，每日都會抽時間上台抽下，再配合跳繩、舉重及ladder training等等，才操得出一副超模身形。

Image description

飲食方面，唔想努力鍛鍊嘅線條付諸流水，當然要小心。嚴格來說，Gigi本身有些少肥妹仔底，所以大部分時間會自己煮健康餐，蔬菜果汁是keep fit孖寶。不過呢，邊有女仔唔為食，因此每星期會定一日做cheat day，意粉芝士漢堡等等盡情放肆，最多食完再操過。最重要係，Gigi明白即使點操點keep，最緊要健康，寧願有少少baby fat，都不會為瘦身節食。

Image description

相比起Gigi Hadid，Kendall Jenner天生是瘦底，所以佢唔需要跟足姊妹搏命打拳，不過都好勤力跑步，以及其他心肺運動。只要一有時間，Kendall就會Forrest Gump上身喪跑，佢自己話對燃燒過多卡路里同保持身體靈活非常見效。其實都唔駛佢講，跑得多，自然瘦，定律來的，幾時見過奧運啲肯雅同埃塞俄比亞長跑運動員有肉？

Image description

幸運遺傳一身瘦，Kendall沒有take it for granted，反而更加注意飲食，奉行勻衡low carb diet，主攻Paleo diet，即是舊石器時代飲食法。即是點？簡單講，就係回到二百萬年前嘅遠古年代，一切回歸自然嘅飲食習慣。理論上，只要唔係加工食品，什麼都可以食，蔬菜要大量，肉、魚同海鮮都不用避，不過量就ok。相反，所有現代人工食品，包括麵包、麵粉製成品、乳製品及豆類等等，一律應免則免，持之以行，適量運動，瘦身不是夢。

Image description

講完食，飲又點呢？據聞佢每朝起身就會飲detox green tea排毒，平均每日飲十二杯！比聽左幾十年都做唔到嘅八杯水更多，model唔易做呢。最後，值得一提是Kendall非常注重睡眠，每日瞓足八小時，否則行天橋都唔夠精神。其實，莫講係時薪多過我哋月薪嘅supermodel，就算係你同我，有邊個唔想每日瞓到自然醒先起身返工？