FW16唔知想點嘅設計...

時裝有好多種，最簡單可以分為靚同唔靚。

靚嘢寫得多，睇得多，有時都會悶，不如轉下口味，睇下今季天橋上面一啲另類設計，當係大家研究下。

真心唔明，點解咁多人捧Kayne West。

如有得罪，多多包涵。

1.Yeezy

由一對唔知咩事炒到癲價的波鞋，再發展成一個ready-to-wear系列，無論大家鍾唔鍾意，Yeezy的確係一個由Kayne West創造嘅神話。其實我覺得笑話比較貼切，Yeezy嘅成功，代表盲目跟隨潮流，真係會凌駕審美觀，眼冤。

Yeezy波鞋熱潮開始退熱，但Kayne West一股雄心壯志，點會滿足於淨係搞波鞋？於是Yeezy玩具愈嚟愈有規模，系列開始有fashion show，好似好犀利，好似。事實啲衫係點，咪就係根據Rick Owens，做咗一批肉酸好多倍嘅Rick Owens出嚟。有圖有真相，今季有呢兩套極品，大家自己品評，係咪見到都唔開胃先！不過，我真心佩服佢嘅勇氣同自信，佢話自己做波鞋同睇見自己喺新聞出現嗰陣，覺得自己好似畢加索咁，仲話同時裝教主Anna Wintour透露過中佬心事，夢想可以做一兩年Hermes創作總監，um.......，真係發夢冇咁早，我反而想知教主即場心裡面嗰句。我都係建議佢不如畀心機認真讀下時裝設計，或者睇多啲時裝大師嘅作品惡補下自己先。

2.Vetements

Vetements（讀「Vet Mon」）係呢一、兩年巴黎最渴市嘅牌子，做嘅係street fashion，賣嘅係hi-fashion價錢。多人搶，因為設計師Demna Gvasalia夠喪，將Martin Margiela廿幾年前初出道嘅style重新再玩，所以嗰啲前後左右亂晒龍嘅解構呀、手袖長到落膝頭嘅oversized呀、玩DHL同Champion logo幽默呀等等元素，一五一十做返晒出嚟，竟然又得。

我幾欣賞佢夠膽發聲，希望改變時裝界入面一啲已經過時，或者唔合理嘅嘢，又好肯玩，譬如啱啱過咗嘅SS17騷，竟然夠膽一次過搵十八個牌子crossover！正常人唔會咁玩。不過呢，玩還玩，有時都會玩大咗，好似今次呢兩個完全唔知想點嘅設計，究竟想點先？呢對好似義肢咁勾住嘅超長手袖，勾住就係解構？格仔恤衫入面加厚pad，就當你係冬天衫要保暖，咁嗰對長到上脾罅嘅boot，入面再攝條牛仔褲，行騷時model幾乎成隻腳硬晒，呢套衫堅難撐，玩得太大。至於另一套西部牛仔衫褲，繡埋好七十年代嘅玫瑰花，唔識講，可能李家鼎會鍾意都唔定。

3.Hood By Air

Hood By Air，早幾年曾經係陳冠希嘅best keep secret，甚至出錢出力喺佢舖頭大力支持，喺百德新街一帶行頭巷尾見到潮童衞衣上面有大大隻HBA，就係佢哋出品，近年由street fashion轉型，想躋身hi-fashion。

不過咁，Hood By Air主腦人Shayne Oliver嘅設計，恕我唔識欣賞，要形容，除左怪，就係好怪，怪過怪獸。好似女model呢件衫，除左用嚟拍日本動漫、騎呢cult片做戲服，又或者cosplay，點搞先？你夠膽着住搭地鐵？至於男model呢套衫，真係上帝的排泄，件褸（其實唔知仲可唔可以歸納為褸）嘅尼龍旅行袋布料，再加埋個航空公司行李barcode，係咪可以連人帶衫，唔駛經海關檢查，直接瞓上行李輸送帶上機？設計師有創意，有幽默感係好事，不過都應該有個譜嘛，否則劉江華都可以笠住佢個friend行catwalk啦。

4.Balmain

曾幾何時，講緊大概係2008-09年，當時Balmain喺Christophe Decarnin主導下，就係憑住一件MJ式尖膊軍褸，加條爛牛仔褲，橫掃時裝界。全世界一線大姐，包括本地嘉玲姐同關芝琳等等，統統排住隊獻身撞衫，堪稱時裝界奇景。可惜，天妒英才，Christophe唔係上咗天堂，而係壓力太大精神崩潰，結果有傳入埋精神病院，品牌喺滾水淥腳之下，換上年僅廿四歲嘅Olivier Rousteing擔大旗。

結果，Olivier不負眾望，證明佢真係未得，經驗唔夠，才華亦相當有限公司。可能係佢想keep住品牌金碧輝煌嘅傳統，同埋Christophe創造嘅搖滾軍事基石，所以季季都金碧輝煌，季季都軍裝，季季都搖滾，令Balmain接近原地踏步，鍾意嘅人，包括Kayne West最想日日出位嘅一家大細，當然一往情深，唔鍾意嘅，直情當佢唔存在。以衫論衫，Olivier嘅設計，簡單講，就係over，有衫為證，睇下秋冬呢套絲絨加絲絨加絲絨加絲絨加絲絨嘅造型，不如畀絲絨唞下啦，佢好攰喇。布料over之餘，details同樣多到眼花，阿Olivier，其實係想玩glamour，定玩武士呢？咁搞法，好難冇事，趁仲後生，不如輕輕鬆鬆，學習唔好搞咁多。