不過,姬菲芙除咗跑得快,最大特色係佢對跑步時裝嘅執著,亦都係因為咁被封為花蝴蝶。話說喺佢高中時代,已經自己設計戰衣參加比賽,仲鼓勵佢嘅隊友喺短褲入面著leggings,即係今日橫掃男女老少嘅跑步裝束。對於點解貪靚貪到上跑道,佢咁答:「Dress good to look good. Look good to feel good. And feel good to run fast!」係咪正先?佢最經典同最犀利嘅打扮,包括著鴛鴦單腳褲、伊斯蘭式包頭戰衣同埋喱士leggings。如果佢唔係咁勁,可能會畀人狂笑。不過,當你係人類史上跑得最快嘅女人,就算留住六吋指甲、轉晒圈咁出戰,只會有人讚你藝高人膽大、帶領潮流,跑得快,唔止好世界。