十招教你35度做個的確涼紳士

呢排日日最高三十四、五度，出街行十分鐘，由頭濕到落腳，見到中環西裝骨骨嘅男士，大熱天時，仲要披住套西裝周街走，佩服到五體投地。

雖然都係西裝一套，科技又未勁到有人發明內置冷氣，其實都有啲地方可以留意下，呢度涼半度，嗰度爽半度，夾夾埋埋，起碼唔駛日日幾乎中暑吖！呢度有十招，大家研究下。

1. Thom Browne短打派

熱成咁，最好梗係著短褲，西裝襯短褲，要請教Thom Browne。佢係當今最身體力行，將百慕達短褲發揚光大嘅設計師，好多人都覺得麻麻地，有興趣嘅又未必夠膽試，其實，短褲又有乜好怕，只要條褲唔好過短，雙腳唔好太光管就ok。

2. 帶住風扇做西裝

假如係訂造西裝，想涼涼爽爽，要識揀布，薄同輕當然好，不過更加關鍵係要通風透氣，所以要揀open weave嘅平織布。所謂open weave，簡單講係縱橫交錯、織得疏啲布，疏到可以透光，或者可以帶把風扇去，喺布前面開風扇，感覺下有幾通爽。

3. 夏日Fiesta？Fresco先啱

阿爸阿爺年代，夏天，梗係著的確涼（Dacron）。的確涼又的確涼，不過唔夠靚囉。外國紳士夏天最鍾意用tropical wool同fresco做西裝，尤其是fresco，雖然布料比較粗糙，又唔夠seersucker輕，但勝在通風同襟磨，不妨試試。

4. 無裡一身輕

To Line or not to Line？呢個Line，係lining個line，夏天西裝，如果唔係傳統羊毛布料，似乎唔加內裡比較清涼。就算lining用絲咁靚，始終絲布密度高，著上身，等於自行焗桑拿，唔然到生熱痱至奇。唯一可以考慮保留，喺對袖入面加囉，穿袖時容易著啲。

5. 時尚大叔打Knit呔

夏天唔想大汗疊細汗，來來去去得一招，乜都要疏要爽，連條呔都唔例外。究竟knit呔係咪真係涼啲呢？多多少少有幫助嘅，至少knit呔幼啲，覆蓋心口嘅範圍少啲，條數係咁計啩，所以其他國家男士直情會打煲呔。不過呢，三十五度喎，仲打呔？熱死人㗎，過兩日先啦！

6. 底？梗係要打

啱啱提過，夏天著西裝，最好有咁薄得咁薄，著少一層得一層，好嘞，咁著唔著底衫？個人認為係要打底，雖然係著多咗件，但呢一件關乎整體外觀，邊個會想自己官仔骨骨，但成件恤衫濕到透？男神拍寫真咩。既然冇得避，唯有揀一件最唔會加重受熱負擔嘅，Uniqlo嘅Airism，暫時係市面上最平靚正嘅選擇，唯一挑剔係cutting太老實。

7. 成功爭取腳踭全裸

數數手指，大概由2009年春夏開始流行吊腳褲，足足七年，全世界紳士都習慣著鞋唔著襪，或者著船襪，總之堅持腳踭野外露出。唔好睇少露出區區幾吋，當你包冚晒下半身，有幾吋唞下氣，點都好過冇。

8. 飲完凍飲仲熱喎

飲完熱飲同凍飲，邊樣令人涼快啲？呢個一直係醫學界拗唔完嘅題目，每逢夏天就會出現各種研究報告，呢份話梗係凍飲清涼，嗰份又話其實熱飲幫助排汗，先至係達到終極散熱目的，睇你信邊個。不過，雙方都同意，冰凍啤酒同咖啡因會令體溫升高，令人感覺更熱，即係好像涼咗，點知原來熱咗，媽呀，我好亂呀！

9. Moisturizers走油吖唔該

要做紳士，身體每一吋都要講究，塊面係核心嘅核心，都幾攰。大熱天時，油脂分泌旺盛過旺角，唔想成面油加汗咁出街，最好唔好用油性護膚品，乜都要走油，因為油脂會停留喺皮膚表面，阻隔皮膚呼吸，即係撻住一塊隱形mask焗住塊面，唔熱至奇。如果要搽，最好揀啲比較水份高嘅moisturizer，同埋減少食肥膩嘢啦。

10. 無敵金句：心靜自然涼

心靜自然涼，由細聽到大。要做到，需要智慧，有排學，加油。

（文：Ben Wong）