扭到計嘅又係日本仔。集英社自1994年推出「盛夏一冊」(ナツイチ natsu-ichi)讀書計劃,每年夏天都以當打偶像做讀男讀女形象代言,同時由各部門、各名人選出80至100冊文庫書單,文庫size仲細過你部iPad mini,上至經典文學,下至新人小品,務求營造姿態:夏天流流長,讀本書,做個品味子,其實唔難 。
睇返歷代「盛夏一冊」代言人,無一不是食正流行文化條水:
1994 內田有紀/《同一屋簷下》收視37.9%
1995 友坂里惠/《金田一少年事件簿》收視23%
1996-98 廣末涼子/《鐵道員》《秘密》
1999 後藤里沙 / 寶礦力廣告
2000 326(Mitsuru)/ 插畫家兼詩人,當年爆紅繪本《溫柔惡魔》是童趣筆風的大人童話,貼近生命教育
2001-02窪塚洋介/《GO大暴走》
2003-04 玉木宏/《五個撲水的少年》
2005 佐藤隆太 / 《海猿》
2006-08 蒼井優/ 《蜂蜜幸運草》、《草裙娃娃呼啦啦》、《料理仙姬》
數到蒼井優,承接《花與愛麗絲》個勢,06年《蜂蜜幸運草》戴上文藝氣質森女光環,難得代言者站在人氣高峰,2007年集英社決定去盡啲,乾脆拍條超短篇(無人會講「微電影」因為日本仔知咩叫自重,短啫,一樣勁,不覺人微言輕;更不要說將故事自貶為賣屎忽的「視頻」了)夏日電影。分半鐘音樂劇,講偶遇、懈逅、自我發現,甜甜酸酸公路電影,由兔仔人與旅者蒼井優對唱,一問一答。第一句歌詞日文是食字,卻又食出詩意:
兔:話說呢,說話是, 萬葉世情
優:說文解字,不過就是文句排隊出列而已
兔:不過呢
優:卻令你淚流滿面
兔:不過呢
合:讓你找到勇敢走下去的動力
(嗱,不劇透,上youtube搵「ナツイチ2007」慢慢J啦)
講到咁勁,發過豬頭啦?盛轉衰的09-11年真係無咩好講,岡田將生、山下莉緒(2009)多部未華子(2010)武井咲(2011)完全係影硬照做咗就算,2011年話係東北震災後未回氣尚是情有可原,回勇要數2012年由剛力彩芽發功擔正的戀愛預告。
舊年反高潮用AKB48,硬照尚可,可惜內容空洞;今年懶過鬼,用《浪客劍心》佐藤健,張相同句slogan都無乜誠意。肉腿動漫無原罪,只不過放在這個難得做了廿年的讀書好案子,好像,錯失了夏天最夢幻的青春。那些烈日、海邊、蟬鳴、草香、廊下和驟熱的滾燙面龐,再毒,會亂翻書的終究是對浪漫有期待的文藝讀撚呀。雙手合十期待出年生性歸位。初戀呀~我要初鏈呀~
寫在(好耐無放過的)暑假最後一天,讀女心經,其實最想以這篇做頭炮。
今後多多指教。
出版社夠薑揼錢用人氣偶像已經唔話得,第一代內田有紀條片就麻麻,勝在眼神凌厲贏個勢。時惟1994,人地廿年前已經行呢套,香港書展?出版社?發行人?市場縮係一件事,唔上進呢,自己知自己事囉。遠見。
1996-98的廣末涼子,能連續三年任「盛夏一冊」的代言人,迄今只有佢同蒼井優(撞鬼,最左邊立下眼以為係上野樹里……)
2007年是屈機之最,咩叫做大個餅?呢啲咪叫智慧囉
嗱,係人都知AKB班乳鴿書都未讀完就出嚟開工,網上仲有個群組係專捉AKB成員失言,事件簿厚過白皮書。即使係勁得更毒組合「桃色四葉草Z」的讀女如我,都唔太受呢套囉。找對的人做做的事,事半功倍,唔係下下都女多人不怪㗎大佬。