《九龍不敗》:Cult到癲 唔正常 │何兆彬

何兆彬 | 2019-06-24

入場前,影友Horace提我:齣戲難看的。我會驚?經歷緊香港史上最重要一齣戲,我仲有嘢驚?

一個月前,我就跟朋友說陳果可能是今年被媽得最勁的香港導演。《三夫》惹起部分女性主義者不滿,影評也不算賣帳。前幾天,我開始改變說法,因為我不認為有觀眾會注意《九龍不敗》。

從前《那夜凌晨》被罵,《九龍不敗》才突破新低,陳果說自己拍過三齣商業片,但真正百分百商業模式的片,今次才是第一齣。電影由天馬(黃百鳴)出品,張晉、劉心悠、Stephy主演,武術指導董暐。天馬一直想捧張晉,想替甄子丹找接班人,張晉幾年前拍《殺破狼2》演奸角人氣彈了一彈,那齣戲他造型好,但再下來幾齣電影無論是葉問外傳張天志又好,其他都好,不能論演技、觀眾緣、功夫(力度、有型)都還不行,遠遠不行。

Image description 九龍(張晉)

人人都說《九龍不敗》難看。的確,但當Cult片睇,換個角度觀感又會唔同晒噃。陳果想拍商業,但除了戲軌及武打元素,根本成齣戲仍然好Cult好陳果:主角姓九名龍,身上紋有九龍;九龍小時候遇過九頭龍(龍以CG製作);王醫師(劉心悠)對九龍有意,把脈時不斷問:你不如畀條龍我把下。其戲中很多對白之不合常理,近乎惹笑,之off beat之跳,真像看七十年代電影。王醫師問完又問九龍給她看龍,九不肯,然後王說:「咁我畀你睇先」就開始剝衫,九龍阻止她的方法竟然是說:扯,你咁飛機場!

打鬥場面也可以很Cult,有一幕九龍與女犯人在輕鐵大戰,輕鐵高速行駛,最後出軌翻車,二人竟然可以在車廂翻滾期間仍在車內打鬥。創作力和幻想真係嚇你一跳。

其實《九龍不敗》完全沒有塑造角色性格(編劇:陳果、紀陶),戲情說香港不斷發生女警被殺案,九龍追查,也完全是劇情工具,看到後來揭發兇手殺人動機,真係X一聲。《九龍不敗》不是再一齣《X風暴》(同樣由天馬出品,如同電視電影質素但在大陸每集都賣幾億的「拾玖」電影),雖然戲由劇本到製作都無力(為甚麼打鬥場面咁弱?看看宇宙最強半力的《大師兄》都遠遠比它好看),但如要㨂《X風暴》或《九龍》二擇一,我一定毫不猶豫推薦你看《九龍》,它難看,但它完全不同其他套路電影。

陳果仍然是陳果,他不過是再一次用電影告訴你「香港獨一無二」,九龍(主角)其實就是香港,從小見過一些常人不相信的力量(龍)。戲中有談到越境執法,略提到香港的無罪推定,東拉西扯。九龍妻子 失蹤後,垂頭喪氣,上司說他「你以前好勁㗎!」,暗戀他的王醫師說他有OCD(強迫症),九龍一直想召喚九龍出來,重獲生命力。片末王醫師說:「你唔係好正常。」九龍:「我唔會正常。」 以前好勁、有點燥狂、強迫症、唔會正常,統統都是指香港。

我不知道陳果還拍不拍商業片。依我猜,他根本不會拍別人的劇本,自己寫,又會寫得Cult到難以接受。他這個人,才是永遠不會變正常的。

Image description 王醫師(劉心悠)