賞下時裝月...餅

Gucci、Céline、Fendi、Saint Laurent同Valentino，邊個月餅盒最靚？邊款最好食？

開估之前，先講下時裝月餅歷史。印象中，大概在十年前，愛馬仕最先推出時裝月餅，主要是送給尊貴VIP與生意伙伴，身為傳媒，掹車邊得益。當時收到長方形橙色盒，一打開，月餅！Wow，不得了，真心唔捨得食，之後幾年，愛馬仕每年都會精心設計小小月餅盒的小玩意，譬如是立體畫及一些活動裝置，自然成為中秋最期待畫面。自此，其他品牌陸續加入，正式展開一場品牌月餅競賽。

1. Gucci 

作為當今最hit品牌，藝術金童Alessandro Michele的花花世界，直接蔓延中秋。Gucci的月餅盒設計，像個寶盒，每個月餅都有迷你花花盒包裝，半島奶黃月餅，月餅上有招牌GG logo，靚到唔捨得食。　

2. Céline

Céline月餅盒紅噹噹，打開紅盒，又有六個白底燙metallic紅字迷你盒，貫徹Phoebe Philo的摩登簡約，月餅是酥皮奶黃，都幾特別。其實咩味都是其次，Céline月餅喎，聽見都贏晒。

3. Hermès

剛才提過，Hermès是月餅先鋒，不過近年開始唔玩月餅，轉而送中秋玩具。繼上年的愛馬仕絲巾手鼓，今年更精美，結合木工同剪紙，製作一個燈泡木燈籠，靚到飛起，嫦娥見到都心動。

4. Fendi

除了愛馬仕，個人認為，Fendi連續幾年都是整月餅禮盒最用心最不惜工本的品牌，創意爆棚。上年是電動走馬燈，今年結合科技，在FF logo的金盒內，拉出來是盒中盒，裡面是一個投射裝置，可以投射出招牌F，說明書話可以放手機入去，在黑暗空間下當projector用，效果當然不能與正常投影機比較。機比機，畀死人咩。　

5. Valentino

Valentino都是用紅盒，盒面是今年男裝的黑豹圖案，好猛！四個獨立包裝小盒一樣精美，最正是白蓮蓉月餅，奶黃不是唔好食，食得多會悶嘛。　

6. Saint Laurent

雖然唔係新年，始終是中國人團團圓圓的傳統節日。黑媽媽的月餅盒，大概會是阿媽與伯母覺得大吉利是的包裝，最好都是自用，或者送贈身邊的黑衣人。

7. Givenchy 

聖羅蘭盒已經夠黑，Givenchy是黑上加黑，盒面是黑色啞面，標誌是燙UV的光面黑，完全承接前任設計師Riccardo Tisci的暗黑美學，不過，隨著Clare Waight Keller上任，下年的設計，可能是另一番風景。

8. Salvatore Ferragamo

以鞋起家，Salvatore Ferragamo在月餅盒都溫馨提示一下，六款顏色迷你盒都印了鬆榚鞋圖案，連月餅都有Gancini logo。

9. Kenzo

Kenzo是今年中秋最大驚喜，木盒設計已是贏在乜乜線，盒面是laser cut花花圖案，入榫式趟門，很日本職人風。木盒內是四個紅色紙盒包裝，都未完，木盒底部，就是鐳射雕刻Kenzo標誌，如果單計月餅盒，今年冠軍。

中秋月餅報告完畢，祝各位中秋節快樂，賞個靚月。　

文：Ben Wong